काठमाडौंको न्युरोड क्षेत्र पुनः तनावग्रस्त बनेकाे छ ।
काठमाडौं महानगरपालिकाले फुटपाथ विस्तारका लागि डोजर चलाउन खोज्दा डोजरमाथि नै चढेर स्थानीयले विरोध गरेपछि न्युरोड क्षेत्र पुनः तनावग्रस्त बनेकाे हो ।
शुक्रबार बिहानै फुटपाथ विस्तार गर्न भन्दै महानगरको टोली डोजर लिएर न्युरोड पुगेको थियो ।
तर स्थानीयले दिनभरि अवरोध गरेपछि महानगरले फुटपाथ विस्तारको काम अगाडि बढाउन सकेको थिएन ।
महानगरले अपरान्ह डोजर चलाउन खोजेपछि डोजरमाथि नै चढेर स्थानीयले पुनः अवरोध सिर्जना गरेका छन् ।
उच्च अदालत पाटनले न्युरोड क्षेत्रमा फुटपाथ विस्तार गर्न बाटो खोलिदिए पछि महानगरले बुधबारदेखि नै पुनः काम सुरु गरेको थियो ।
यसअघि काठमाडौं महानगरले न्युरोडमा फुटपाथ विस्तारका लागि सडकको कालोपत्रे समेत भत्काएको थियो । तर सडक डिभिजन कार्यालयले हस्तक्षेप गरेर सो ठाउँमा पुनः कालोपत्रे गरेको थियो ।
सडक डिभिजन कार्यालयको हस्तक्षेपको विरोधमा महानगरले उच्च अदालत पाटनमा रिट दिएको थियो ।
सो रिटमा सुनुवाइ गर्दै उच्च अदालतले सहरी सडक स्थानीय तह मातहतमा रहने भन्दै न्युरोडमा फुटपाथ विस्तारको काम नरोक्न अन्तरिम आदेश दिएको थियो ।
उच्च अदालत पाटनका न्यायाधीश ध्रुवराज नन्द र प्रकाश खरेलको संयुक्त इजलासले न्युरोडमा फुटपाथ विस्तार रोक्ने गरी डिभिजन सडक कार्यालयले महानगरलाई लेखेको पत्र कार्यान्वयन नगर्न भने पछि महानगरले काम थालेको हो ।
प्रतिक्रिया
सम्बन्धित खवर
